Reminder: Pekelder Proatcafé op 12 november
Geplaatst: donderdag 6 november 2025 om 12:15 | Views: 4740
Auteur: Bram Wiekens
OUDE PEKELA - Wozzen ie dat d’eerste strokartonfabriek in Grunnen in 1870 sticht wuir. Op t Hoogezaand. En dat de Aa-stroom d’eerste in Olde Pekel was. Was joe traauwens bekìnd, datter in totoal 23 strokartonfebrieken in Grunnen stoan hebben, woarvan t grootste dail in Veenkelonies. En …. datter in dijzulfde kontraaien verschaaiden kartonnagebedrieven actief waren. Zoals Zaadhof in Winschoot, Sparreboom en Free & Co in Pekel en Hollandia in Veendam.
Paul Herwig, van 1982 tot 1992 directeur van kartonnagefabriek Hollandia is nuigd om ons in t Pekelder Proatcafé van woensdag 12 november bie te proaten en mit te nemen op n raaize deur kartonnagelaand.
Nijsgiereg noar zien verhoal?
Den binnen ie 12 november van haarte welkom in de ‘Binding’ in Olde Pekel.
Wie begunnen om 19.30 uur/ de zoal is om 19.00 uur open.
Kosten? €5 en doar kriegen ie ook nog vergees n kop kovvie/thee veur.
Ook traktaaiern wie joe nog op n verhoal van Bram Wiekens en Veendammer troubadour Krzysztof Groen zörgt dij oavend veur n mooi stokje muziek.
De kommissie.