19 meert Pekelder Proatcafé over Pekelder middenstand in de Kiepe
Geplaatst: maandag 18 maart 2019 om 21:45 | Views: 7683
NIEUWE PEKELA - Wozzen ie dat proat kommende dinsdagoavend, 19 meert, over Pekelder middenstand goan zel en dat Sjoerd Mulder doarbie op zien proatstoul komt te zitten. Dat hai honderdoet vertellen gaait over drokke bedounen in grote en lutje winkeltjes van n haalve aiw leden. Mor ook woarom moeke hom hoast strafde veur n simpel stroopbodschopke. En dat hai ons noast zien vertelsters mit n kovver vol beelden verrazzen gaait en terogge raaizen let in de tied.
Dat Bram Wiekens eindelks oet de school klappen duurft, woarom hai laiver het dat kastdeuren sloten blieven. Dat Bob Heidema veur n twijde moal de stroatklinkers oet de weg zingen gaait. n Aantrekkelk pergram?
As t joe wat liekt, den nuigen we joe groag veur t leste Pekelder Proatcafé van dit seizoen. Veurstellen speult zok òf in de Kiepe in Nij Pekel en t begunt om haalf acht. Vanòf zeuven uur kinnen je joe al n goud stee oetzuiken. De kosten? €5, mor mit n vergees kopke kovvie tou.
Wie zain joe groag op dinsdag 19 meert.
